މިދިޔަ މެއި މަހު ރާއްޖޭގެ ފަތުރުވެރިކަމުގެ ސިނާއަތަށް 13 ޕަސެންޓްގެ ކުރިއެރުމެއް ލިބިފައިވާކަމަށް ޓޫރިޒަމް މިނިސްޓްރީން ބުނެފި އެވެ.
އެ މިނިސްޓްރީން ނެރުނު އެންމެ ފަހުގެ ތަފާސްހިސާބުތަކުން ދައްކާގޮތުގައި މިދިޔަ މެއި މަހު ރާއްޖެއަށް 135,614 ފަތުރުވެރިން ޒިޔާރަތްކޮށްފައިވެ އެވެ. މިއީ 2022 ވަނަ އަހަރުގެ މެއި މަހާ އަޅާބަލާއިރު 15,741 ފަތުރުވެރިން އިތުރު އަދަދެކެވެ.
2023 ވަނަ އަހަރުގެ މިހާތަނަށް ރާއްޖެއަށް ޒިޔާރަތްކޮށްފައިވާ ފަތުރުވެރިންގެ ޖުމްލަ އަދަދު 966,358 އަށް އަރާފައިވާއިރު، މިއީ މިދިޔަ އަހަރުގެ މި މުއްދަތާ އަޅާބަލާއިރު 8.3 ޕަސެންޓްގެ އިތުރުވުމެކެވެ.
މި ކުރިއެރުމާއެކު، މި އަހަރު ނިމުމުގެ ކުރިން 2.3 މިލިއަން ފަތުރުވެރިން ރާއްޖެއަށް ގެނައުމުގެ އަމާޒަށް ވާސިލުވެވޭނެކަމަށް ލަފާކުރެވެ އެވެ.
މިއަހަރު އެންމެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވަނީ ޗައިނާއިންނެވެ. އޭގެ ފަހަތުން ރަޝިޔާ، އިނގިރޭސިވިލާތް، އިޓަލީވިލާތް އަދި ޖަރުމަނުވިލާތް ހިމެނެ އެވެ.
މިވަގުތު ރާއްޖޭގައި 1,195 ތަނަކުން ފަތުރުވެރިންނަށް ހިދުމަތް ފޯރުކޮށްދެމުން ގެންދާއިރު، ޖުމްލަ 64,044 އެނދު ހުރިކަމަށް އެ ވުޒާރާއިން ހާމަކޮށްފައިވެ އެވެ.
