ދުނިޔޭގެ ފަތުރުވެރިކަމުގެ ދާއިރާގައި ދެވޭ އެންމެ ޝަރަފުވެރި އެއް އެވޯޑު ކަމަށްވާ ވޯލްޑް ޓްރެވަލް އެވޯޑްސް (ޑަބްލިއުޓީއޭ) ގެ އިންޑިއަން އޯޝަން ކެޓަގަރީގެ އެންމެ ޝަރަފުވެރި އެވޯޑުތަކާ އެކު، ދިވެހިރާއްޖެއިން މި ސަރަހައްދުގެ އެންމެ މަގުބޫލު މަންޒިލުގެ މަގާމު އަނެއްކާ ވެސް ދިފާއުކޮށްފި އެވެ.
ރާއްޖެއިން ވަނީ މި ކެޓަގަރީން ޖުމްލަ ފަސް އެވޯޑެއް ކާމިޔާބުކޮށް ބޮޑު ކާމިޔާބީއެއް ހޯދާފަ އެވެ.
ރޭ ކްރޮސްރޯޑް މޯލްޑިވްސްގައި ކުލަގަދަކޮށް ބޭއްވި މި އެވޯޑު ދިނުމުގެ ރަސްމިއްޔާތުގައި ރާއްޖެއަށް ލިބުނު ފަސް އެވޯޑަކީ:
- އިންޑިއަން އޯޝަންސް ލީޑިން ޑެސްޓިނޭޝަން 2026
- އިންޑިއަން އޯޝަންސް ލީޑިން ޑައިވް ޑެސްޓިނޭޝަން 2026
- އިންޑިއަން އޯޝަންސް ލީޑިން ގްރީން ޑެސްޓިނޭޝަން 2026
- އިންޑިއަން އޯޝަންސް ލީޑިން ހަނީމޫން ޑެސްޓިނޭޝަން 2026
ގައުމީ ފެންވަރުގައި ރާއްޖެއަށް ލިބުނު އެވޯޑުތަކުގެ އިތުރުން، ރާއްޖޭގައި ފަތުރުވެރިކަމުގެ ހިދުމަތްދޭ 15 އަށް ވުރެ ގިނަ ބްރޭންޑުތަކުން ވަނީ އެކި ދާއިރާތަކުން ފާހަގަކޮށްލެވޭ އެވޯޑުތައް ހާސިލްކޮށްފަ އެވެ. އޭގެ ތެރޭގައި ލަގްޒަރީ ރިސޯޓުތަކާއި ހޮސްޕިޓަލިޓީ، އޭވިއޭޝަން، ޑައިވިން، ހަނީމޫން ހިދުމަތްތައް، ސުޕަ ޔޮޓް ފަތުރުވެރިކަން އަދި ތިމާވެއްޓާ ރައްޓެހި ދެމެހެއްޓެނިވި ޒިންމާދާރު ފަތުރުވެރިކަމުގެ ދާއިރާތައް ހިމެނެ އެވެ.
މި އެވޯޑު ހަފްލާ ރާއްޖޭގައި ބޭއްވިގެން ދިއުމަކީ ރާއްޖޭގެ ފަތުރުވެރިކަން މުޅި ދުނިޔެއަށް އިތުރަށް އިޝްތިހާރުކޮށް، ގައުމުގެ ފަތުރުވެރިކަމުގެ ސިނާއަތް ކުރިއެރުވުމަށް ލިބުނު ވަރަށް ރަނގަޅު ފުރުސަތެއް ކަމަށް ވިޒިޓް މޯލްޑިވްސް (ވީއެމްސީ) އިން ވަނީ ހާމަކޮށްފަ އެވެ.
ފާހަގަކޮށްލެވޭ ގޮތުގައި ފާއިތުވި ހަ އަހަރު ވެސް ރާއްޖެއިން ވަނީ އިންޑިއާ ކަނޑުގެ ސަރަހައްދުގެ އިތުރުން މުޅި ދުނިޔޭގެ ވެސް އެންމެ މަގުބޫލު އަދި އެންމެ ކުރިއަރާފައިވާ ފަތުރުވެރިކަމުގެ މަންޒިލުގެ އެވޯޑު ކާމިޔާބުކޮށް، ދުނިޔޭގެ ފެންވަރުގައި ރާއްޖޭގެ މަގާމު ސާބިތުކޮށްދީފަ އެވެ.
