ރާއްޖޭގެ ތާރީހުގައި ވެސް ގެންނަ އެންމެ ބޮޑު އިންވެސްޓްމެންޓް ކުރާ ކުންފުނީގެ ހައިސިއްޔަތުން އީގަލް ހިލްސްއަށް ދިވެހި ރައްޔިތުން އިތުބާރުކުރާ ކަމަށް އެ ކުންފުނީގެ ޗެއާމަން މުހައްމަދު އަލްބާރު ވިދާޅުވެއްޖެ އެވެ.

ޔުނައިޓެޑް އަރަބް އެމިރޭޓްސްގެ މަޝްހޫރު އީގަލް ހިލްސް ކުންފުނިން ރަސްމާލޭގައި "މޯލްޑިވްސް ވޯޓާފްރޮންޓް އެންޑް މެރީނާ" ގެ ނަމުގައި ބިޔަ މަޝްރޫއެއް ހިންގުމަށްޓަކައި ސަރުކާރާއެކު ވަނީ ކޮމާޝަލް ޓާމްސް އެއްބަސްވުމެއްގައި ސޮއިކޮށްފަ އެވެ. މި މަޝްރޫއުގެ ދަށުން ރަސްމާލެއިން 500 ހެކްޓަރުގެ ބިން އެ ކުންފުންޏަށް ދޫކުރުމަށް ސަރުކާރުން ނިންމާފައިވާއިރު، މި އެއްބަސްވުމާ މެދު ސިޔާސީ ބައެއް ފަރާތްތަކުން އަންނަނީ ކަންބޮޑުވުން ފާޅުކުރަމުންނެވެ.

އިންސްޓަގްރާމް މެދުވެރިކޮށް އަލައްބާރު އާންމުކުރެއްވި މެސެޖުގައި ވިދާޅުވީ، ރާއްޖޭގެ ތާރީހުގައި އަންނަ އެންމެ ބޮޑު އިންވެސްޓްމެންޓާއެކު ދިވެހިން އެ ކުންފުންޏަށް އިތުބާރުކުރުމަކީ ލިބޭ ބޮޑު ޝަރަފެއް ކަމަށެވެ. އަދި ރަސްމާލޭގެ މަޝްރޫއު ކުރިއަށް ގެންދާނީ ދިވެހި ރައްޔިތުންގެ އުއްމީދުތަކާ އެއްގޮތަށް، ރާއްޖޭގެ އިގުތިސާދަށާއި ރައްޔިތުންނަށް އެންމެ ފައިދާހުރި ގޮތުގައި ކަމަށް ވެސް އޭނާ ވިދާޅުވި އެވެ.

"ތާރީހުގައި އަންނަ އެންމެ ބޮޑު އިންވެސްޓްމެންޓާ އެކު ދިވެހިން އަޅުގަނޑުމެންނަށް އިތުބާރުކުރޭ. މިއީ އަޅުގަނޑުމެންނަށް ލިބޭ ޝަރަފެއް. ﷲ މިކަމުގައި ތައުފީގުދެއްވާށި. ﷲ އިރާދަކުރެއްވިއްޔާ އެ މީހުންގެ އުއްމީދާ އެއްގޮތަށް އަޅުގަނޑުމެން މަަސައްކަތްކުރާނަން،" ވީޑިއޯ މެސެޖްގައި އަލައްބާރު ވިދާޅުވި އެވެ.

ރަސްމާލެ މަޝްރޫއު ނިމޭއިރު އޮންނާނެ ގޮތުގެ ތަސައްވުރު ހާމަކުރައްވަމުން އަލައްބާރު ވިދާޅުވީ، އެތަނުގައި އުފައްދަނީ ދިރިއުޅުމުގެ ހާއްސަ ވައްޓަފާޅިއެއް ކަމަށެވެ. އެގޮތުން ރީތި ގޮނޑުދޮށްތަކާއި، ހޮޓާތަކާއި، ރެސްޓޯރެންޓްތަކުގެ އިތުރުން ކުޅިވަރު ކުޅޭނެ ތަންތަނާއި ކުޑަކުދިންނަށް ހާއްސަ ވަސީލަތްތައް އެތަނުގައި ގާއިމުކުރެވޭނެ ކަމަށް އޭނާ ފާހަގަކުރެއްވި އެވެ.

އޭނާ އިތުރަށް ވިދާޅުވީ ރަސްމާލެއިން ޕްރޮޕަޓީއެއް ގަންނަ ފަރާތްތަކަށް، މުޅި ދުނިޔޭގެ ނިސްބަތުން ވެސް މިފަދަ ވިޔަފާރިއަކުން ލިބޭނެ އެންމެ ރަނގަޅު މާލީ ފައިދާ ލިބިގެންދާނެ ކަމަށެވެ.

އިތުރު ލިޔުންތައް
ވިޔަފާރި ދުބާއީ ރަސްމާލެ