މިދިޔަ މަހު 150،000އަށް ވުރެ ގިނަ ޓޫރިސްޓުން ރާއްޖެ އައިސްފައިވާ ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފި އެވެ. އެކަމަކު މިއީ އޭގެ ކުރީ އަހަރުގެ އެ މުއްދަތާ އަޅާބަލާއިރު ވެސް ދަށް އަދަދެކެވެ.
ޓޫރިޒަމް މިނިސްޓްރީން އާއްމުކުރި ތަފާސްހިސާބުތައް ދައްކާ ގޮތުން މިދިޔަ ސެޕްޓެމްބަރު މަހު ރާއްޖެއަށް 150,764 ޓޫރިސްޓުން އައި އިރު، މިދިޔަ އަހަރުގެ ސެޕްޓެމްބަރު މަހު 151,114 ޓޫރިސްޓުން އައިސްފައިވެ އެވެ. އެހެންކަމުން މިއީ 0.2 އިންސައްތަ ދަށް އަދަދެކެވެ.
އެ ތަފާސްހިސާބުތައް ދައްކާ ގޮތުން މިދިޔަ މަހު އެވްރެޖްކޮށް ދުވާލެއްގެ މައްޗަށް 5,872 ޓޫރިސްޓުން އައިސްފައިވެ އެވެ. މި މުއްދަތުގެ ތެރޭގައި އެންމެ ގިނަ އަދަދަކަށް ޓޫރިސްޓުން އައީ މިދިޔަ މަހުގެ 26 ވަނަ ދުވަހު އެވެ. އެ ދުވަހު އެކަނިވެސް ރާއްޖެއަށް 6,284 ޓޫރިސްޓުން އައިސްފައިވެ އެވެ.
މިއާއެެކު އަހަރުގެ މިހާތަނަށް ރާއްޖެއަށް އައިސްފައި ވަނީ 1,603,021 ޓޫރިސްޓުންނެވެ. މިދިޔަ އަހަރުގެ މި މުއްދަތުގައި ރާއްޖެއަށް އައިސްފައި ވަނީ 1,659,031 ޓޫރިސްޓުންނެވެ. އެހެން ކަމުން މިއީ 3.4 ޕަސެންޓް ދަށް އަދަދެކެވެ.
އެންމެ ގިނައިން ޓޫރިސްޓުން އައި 5 ގައުމު:
- ޗައިނާ: 300,977 ޓޫރިސްޓުން
- ރަޝިއާ: 229,236 ޓޫރިސްޓުން
- އިނގިރޭސިވިލާތް: 119,968 ޓޫރިސްޓުން
- ޖަރުމަން: 99,062 ޓޫރިސްޓުން
- އިޓަލީ: 98,039 ޓޫރިސްޓުން
ތަފާސްހިސާބުތަކުން ދައްކާގޮތުގައި މިމުއްދަތުގައި ރާއްޖެ ޒިޔާރަތްކުރި ފަތުރުވެރިންގެ ތެރެއިން 1,158,404 ޓޫރިސްޓުން ޗުއްޓީ ހޭދަކޮށްފައި ވަނީ ރިސޯޓުތަކުގަ އެވެ. ގެސްޓްހައުސްތަކުގައި 345,220 ޓޫރިސްޓުން ޗުއްޓީ ހޭދަކޮށްފައިވާއިރު، ހޮޓާތަކުގައި 36,106 ޓޫރިސްޓުން އަދި ސަފާރީ އުޅަނދުތަކުގައި 29,679 ޓޫރިސްޓުން ޗުއްޓީ ހޭދަކޮށްފައިވެ އެވެ.
ރާއްޖެއަށް އަންނަ ޓޫރިސްޓުންގެ އަދަދު ދަށަށް ދާއިރު، ސަރުކާރުގެ ސިޔާސަތުތަކަށް ގެންނަ ކުއްލި ބަދަލުތަކުގެ ނޭދެވޭ ނަތީޖާ ޓޫރިޒަމް އިންޑަސްޓްރީއަށް ދަނީ ފޯރަމުންނެވެ.
ރާއްޖޭގައި ރަޖިސްޓަރީވެފައި ނުވާ ބޭރުގެ ޓުއާ އޮޕަރޭޓަރުންނާއި ޓްރެވަލް އެޖެންޓުން އަދި އޮންލައިން ބުކިން ޕްލެޓްފޯމްތަކުން ޓީޖީއެސްޓީ ނަގަން ފެށުމުން ބޭރުގެ ޓުއާ އޮޕަރޭޓަރުން ދަނީ އެކަމާ ދެކޮޅު ހަދަމުންނެވެ. މިގޮތުން ޓީޖީސްޓީގެ އާ އުސޫލާ މެދު ޔޫރަޕާއި، އިނގިރޭސިވިލާތް އަދި ރަޝިޔާގެ ކަމާ ގުޅޭ ޖަމްއިއްޔާ ޖަމާއަތްތަކުން ވަނީ ނުރުހުން ފާޅުކޮށް އެކަން އިސްލާހު ކުރުމަށް ސަރުކާރުގައި އެދިފަ އެވެ. އަދި އިންޑިއަން އެސޯސިއޭޝަން އޮފް ޓުއާ އޮޕަރޭޓާސް (އައިއޭޓީއޯ)އިން ވެސް ވަނީ އަހަރެއްހާ ދުވަހަށް ފަސްކޮށްދޭން ދިވެހި ސަރުކާރުގައި އެދިފަ އެވެ.
